بولان کے پولیس تھانہ صدر بھاگ کی حدود میں فائرنگ کے ایک واقعے میں دو خواتین ہلاک جبکہ ایک خاتون زخمی ہوگئی۔
پولیس کے مطابق واقعہ تحصیل بھاگ کے علاقے گوٹھ لعلو گجر میں پیش آیا، جہاں ایک مسلح شخص نے فائرنگ کر دی۔ فائرنگ کے نتیجے میں دو خواتین موقع پر ہلاک جبکہ ایک خاتون زخمی ہوگئیں۔
پولیس کا کہنا ہے کہ واقعہ مبینہ طور پر گھریلو ناچاقی اور دیگر الزامات کے باعث پیش آیا۔
اطلاع ملنے پر پولیس اور امدادی ٹیمیں موقع پر پہنچ گئیں اور جاں بحق خواتین کی لاشوں اور زخمی خاتون کو سول ہسپتال منتقل کیا گیا۔
ہسپتال ذرائع کے مطابق لاشوں کو ضروری قانونی کارروائی اور پوسٹ مارٹم کے بعد ورثاء کے حوالے کر دیا گیا، جبکہ زخمی خاتون کو ابتدائی طبی امداد کے بعد تشویشناک حالت میں مزید علاج کے لیے دوسرے ہسپتال ریفر کر دیا گیا ہے۔
پولیس نے جائے وقوعہ سے شواہد اکٹھے کر کے ملزم کی گرفتاری کے لیے چھاپے شروع کر دیے ہیں، جبکہ مزید قانونی کارروائی جاری ہے۔
