بلوچستان کے ضلع گوادر کی تحصیل جیونی میں مسلح افراد نے پاکستان کوسٹ گارڈز کے اہلکاروں پر گھات لگا کر حملہ کیا، جس کے نتیجے میں دو اہلکار ہلاک ہوگئے۔
ذرائع کے مطابق واقعہ جمعے کی شام جیونی کے ساحلی علاقے کنٹانی کے مقام “مچیں کاپر” کے قریب پیش آیا، جہاں کوسٹ گارڈز اہلکار معمول کے گشت پر مامور تھے۔
عینی شاہدین کا کہنا ہے کہ حملہ آوروں نے قریب پہنچ کر اہلکاروں پر اندھا دھند فائرنگ کی، جس کے نتیجے میں دونوں اہلکار موقع پر ہی ہلاک ہوگئے۔
علاقائی ذرائع کے مطابق حملہ آور کارروائی کے بعد ہلاک اہلکاروں کا اسلحہ اور دیگر سامان اپنے ساتھ لے گئے اور فرار ہونے میں کامیاب ہوگئے۔
واقعے کے بعد سیکیورٹی فورسز نے علاقے کو گھیرے میں لے کر سرچ آپریشن شروع کر دیا ہے۔
تاحال کسی تنظیم نے حملے کی ذمہ داری قبول نہیں کی ہے۔
