آپ کی موت محض میرا ذاتی المیہ نہیں، بلکہ ایک پورے گاؤں کی ویرانی کا استعارہ ہے۔ آپ اس علاقہ کی رونق تھے، اس کی زیب و زینت تھے۔ آج وہی بستی اداس، خاموش اور پژمردہ کھڑی ہے، گویا اس کی سانسیں بھی آپ کے ساتھ ہی رخصت ہو گئی ہوں۔آپ نہ جانے ہمیں، اپنے احباب کو، اور اس بستی کو کس حال میں چھوڑ گئے۔ آپ کے جانے کے بعد یہاں کی ہر شے سوگ میں ڈوبی ہوئی محسوس ہوتی ہے۔ ہر گلی، ہر در، ہر دیوار آپ کی یاد میں گم ہے۔ آپ کے والدین، بہن بھائی، اور بے شمار لوگ آپ کو یاد کر کے اشک بار ہیں، مگر میں…۔۔۔میں ان سب سے جدا ہوں۔
مجھے یوں محسوس ہوتا ہے جیسے آپ کے جانے سے وقت تھم سا گیا ہو۔ سب کچھ چل تو رہا ہے، مگر کچھ بھی پہلے جیسا نہیں رہا۔ میری بے چینی صرف آپ کی جدائی کا غم نہیں، بلکہ یہ بھی ہے کہ ہر شے، ہر لمحہ، ہر منظر مجھے آپ کی یاد دلاتا ہے۔یوں محسوس ہوتا ہے جیسے دنیا کا ہر سوال آ کر آپ ہی پر ختم ہو جاتا تھا۔ آپ کی دکان آج بھی ویسی ہی ہے، مگر وہاں کی ہر شے آپ کا نام لے کر پکارتی معلوم ہوتی ہے۔ آپ کی تصویر کو دیکھ کر لوگ مسکرا تو دیتے ہیں، مگر وہ مسکراہٹ بھی اشکوں میں بھیگ جاتی ہے۔
وہ کرسی، جہاں آپ مغرب کے وقت بیٹھ کر چائے نوش فرمایا کرتے تھے، آج خاموش اور اداس ہے، گویا وہ بھی آپ کی منتظر ہو۔
آپ کے جانے کے بعد دل میں ایک گہرا خلا پیدا ہو گیا ہے۔ آپ کی یادیں ہر لمحہ ساتھ رہتی ہیں۔ ہر کام میں آپ کی پیش قدمی، ہر مشکل میں دوسروں کا سہارا بننے کا آپ کا انداز، اور ہر دل کو حوصلہ دینے والا آپ کا لمسیہ سب آج بھی محسوس ہوتا ہے۔آپ کی نیک عادتیں اور اچھائیاں انسان کی زندگی میں روشنی بن کر باقی رہتی ہیں۔ آپ کا اثر، آپ کی محبت، اور آپ کی فیاضی ہر دل میں زندہ ہے۔ اب آپ ہمارے درمیان نہیں رہے، مگر آپ کی یاد اور آپ کی روشنی ہمیشہ ہمارے ساتھ رہے گی۔
ہر لمحہ جو آپ نے دوسروں کے لیے وقف کیا، وہ آج بھی دلوں میں ایک نرم روشنی کی مانند روشن ہے۔ آپ کی مسکراہٹ، آپ کی باتوں کا سکون، اور ہر چھوٹا سا عمل جو آپ نے محبت سے کیاوہ سب ہمیشہ یاد رہے گا۔اب جب آپ یہاں نہیں ہیں تو خاموشی میں بھی آپ کی موجودگی کا احساس ہوتا ہے۔ آپ کا اثر، آپ کی محبت، اور آپ کی رہنمائی ہر قدم پر ہمارے ساتھ ہے۔ آپ کی یادیں ہمیں آگے بڑھنے کا حوصلہ دیتی ہیں اور زندگی کی راہوں میں سکون بخشتی ہیں۔
آپ کے کپڑے، آپ کی اشیاء…۔۔۔ان سب کو دیکھ کر دل بھر آتا ہے۔ یہ گھر اب گھر نہیں رہا، بلکہ ایک یادگار بن گیا ہے
ایک ایسا میوزیم، جہاں ہر شے آپ کی کہانی سناتی ہے۔ لوگ آتے ہیں، دیکھتے ہیں، مسکراتے ہیں، اور پھر آنکھوں میں نمی لیے لوٹ جاتے ہیں۔اور میں… میں آج بھی آپ کی تصویر سے باتیں کرتا ہوں، اپنے دل کا حال سناتا ہوں، اپنے سوالات رکھتا ہوںمگر وہاں سے کوئی جواب نہیں آتا۔ بس ایک خاموشی ہے، جو ہر روز مجھے تھوڑا اور توڑ دیتی ہے۔
لوگ آپ کو یاد کر کے روتے ہیں، آپ کے لیے دعائیں کرتے ہیں، مگر میرا غم کچھ اور ہے۔ میرا دکھ صرف آپ کی جدائی کا نہیں، بلکہ اس خلا کا ہے جو آپ چھوڑ گئے ہیں۔ ایک ایسا خلا جو کبھی پُر نہیں ہو سکتا۔ میں لوگوں کے درمیان ہوتے ہوئے بھی تنہا ہوں، کیونکہ جس نے میری تنہائی کو ختم کیا تھا، وہی آج میری سب سے بڑی تنہائی بن گیا ہے۔
یہ دنیا بے رحم ہے۔ یہاں زندگی کسی کے رکنے سے نہیں رکتی، مگر کچھ لوگ ایسے ہوتے ہیں جن کے جانے سے زندگی کا مطلب ختم ہو جاتا ہے۔ آپ بھی ان ہی میں سے ایک تھے۔ آپ کے بغیر سب کچھ ادھورا ہے، بے رنگ ہے، بے روح ہے۔
آپ چلے گئے، مگر اپنے پیچھے ایک ایسی خاموشی چھوڑ گئے جو چیخ چیخ کر آپ کی کمی کا اعلان کرتی ہے۔ یہ خاموشی کبھی ختم نہیں ہوگی، کیونکہ کچھ رشتے وقت کے ساتھ نہیں مٹتےوہ یادوں میں زندہ رہتے ہیں، درد بن کر، آنسو بن کر، اور ایک ایسے سوال کی صورت میں جس کا کوئی جواب نہیں ہوتا:
آخر کیوں؟
خالد جان! واپس آ جائیے… آپ کی یاد بہت آ تی ہے۔
