خضدارپریس کلب میں خضدار گزگی بلوچ آباد کی بوڑھی اور ضعیف العمرخاتون شہربانو جو ٹانگوں سے معذور اور لاٹھی کے سہارے چلتی ہیں اپنے یتیم نواسے کی گمشدگی کی فریاد لے کر پہنچیں۔
شہربانو خاتون نے بتایا کہ ان کا نواسہ ڈرائیورشعیب احمد ولد عبدالمنان قوم مینگل ایک یتیم لڑکا ہے، جس کے والدین اس کی کمسنی میں وفات پا چکے ہیں۔ اللہ تعالیٰ کی مدد سے ان کی میں نے پرورش کرکے بڑا کیاشعیب احمد گھر کا واحد کفیل تھا اور ڈرائیوری کرکے گھر کا خرچ چلاتا تھا۔ دو ماہ قبل وہ ضلع آواران کے علاقہ جھاﺅ آواران گاڑی میں گیا تھا جہاں سے وہ گاڑی سمیت لاپتہ ہوگیا۔
خاتون نے روتے ہوئے کہامیں لاٹھی کے سہارے یہاں تک آئی ہوں، میرا نواسہ میرا سہارا تھا، اسے ڈھونڈنے میں میری مدد کریں۔
انہوں نے ڈپٹی کمشنر آواران سے فوری مدد کی اپیل کی ہے ان کا کہنا تھا کہ شعیب احمد مینگل کی بازیابی کے لیئے حکام فوری اقدامات کریں۔ ساتھ ہی انہوں نے بلوچ عوام سے بھی درخواست کی کہ وہ اس معاملے میں تعاون کریں اور کوئی بھی معلومات ملنے پر رابطہ کریں۔ انہوں نے کہاکہ جو کوئی بھی شعیب احمد مینگل کے بارے میں معلومات رکھتا ہو، وہ فوری طور پر خضدار پریس کلب یا ڈپٹی کمشنر آواران کے دفتر سے رابطہ کرے۔
