بلوچستان کے ضلع مستونگ کے علاقے دشت میں فورسز اور مسلح افراد کے درمیان جھڑپیں ہوئیں۔ پاکستانی فوجی ذرائع کے مطابق آپریشن کے دوران چار مسلح افراد مارے گئے ہیں۔ تاہم واقعے پر کسی مسلح تنظیم کی جانب سے تاحال کوئی مؤقف سامنے نہیں آیا۔
اطلاعات کے مطابق جمعہ کی صبح دشت کے علاقے زہری گٹ میں پاکستانی فوج نے آپریشن کیا جس میں ڈرون طیارے اور ہیلی کاپٹر استعمال کیے گئے۔ ذرائع نے بتایا کہ پہلے ڈرون طیارے سے گولے داغے گئے اور بعد ازاں ہیلی کاپٹروں کے ذریعے فوجی اہلکاروں کو علاقے میں اتارا گیا۔
علاقہ مکینوں کا کہنا ہے کہ آپریشن کے دوران کئی گھنٹے تک شدید فائرنگ اور دھماکوں کی آوازیں سنی گئیں۔ تاہم علاقے میں مواصلاتی نظام متاثر ہونے کے باعث ہلاکتوں اور نقصان کی آزاد ذرائع سے تصدیق ممکن نہیں ہوسکی۔
واضح رہے کہ حالیہ دنوں میں بلوچستان کے مختلف علاقوں میں فورسز اور مسلح افراد کے درمیان جھڑپوں کے واقعات میں اضافہ دیکھنے میں آیا ہے۔
