اسرائیلی فضائیہ نے ایران کے مغربی شہر ہمدان میں واقع نوجہ ایئربیس پر ایک گھنٹے کے دوران دو بار فضائی حملے کیے۔ ترک خبررساں ادارے انادولو ایجنسی کے مطابق یہ اطلاعات ایران کی فارس نیوز ایجنسی کے حوالے سے سامنے آئیں۔ جانی و مالی نقصان کی تفصیلات تاحال دستیاب نہیں ہو سکیں۔
اس سے قبل آج علی الصبح اسرائیل کے بڑے حملے میں ایرانی مسلح افواج کے سربراہ میجر جنرل محمد باقری، پاسداران انقلاب کے سربراہ میجر جنرل حسین سلامی، 4 اعلیٰ فوجی افسران اور 6 جوہری سائنسدان ہلاک ہوئے تھے۔ مجموعی طور پر 78 افراد کی کی ہلاکت اور 329 کے زخمی ہونے کی اطلاع دی گئی ہے۔
سپریم لیڈر آیت اللہ علی خامنہ ای نے اسرائیلی حملوں کو ایران کے خلاف ایک سنگین جرم قرار دیتے ہوئے کہا کہ دشمن نے اپنی تلخ تقدیر خود رقم کی ہے۔ ایرانی صدر مسعود پزشکیان نے شدید ردعمل میں کہا کہ اسرائیل اپنی احمقانہ اور سفاکانہ جارحیت پر پچھتائے گا اور اس کا بھرپور جواب دیا جائے گا۔
