بلوچستان کے علاقے بختیار آباد میں نامعلوم مسلح افراد کی فائرنگ سے ایک پولیس اہلکار ہلاک ہو گیا۔ پولیس کے مطابق ہلاک اہلکار کی شناخت محمد بخش سیال کے نام سے ہوئی ہے۔ واقعے کے محرکات تاحال معلوم نہیں ہو سکے جبکہ کسی گروپ کی جانب سے ذمہ داری بھی قبول نہیں کی گئی۔
دوسری جانب سندھ کے ضلع شکارپور میں سلطان کوٹ اور ہمایوں شریف ریلوے اسٹیشنز کے درمیان ریلوے ٹریک پر دھماکے کی اطلاع موصول ہوئی ہے۔ ابتدائی اطلاعات کے مطابق دھماکہ ریلوے لائن کو نشانہ بنا کر کیا گیا، تاہم فوری طور پر کسی جانی نقصان کی اطلاع نہیں ملی۔
ذرائع کے مطابق 39-اپ جعفر ایکسپریس دھماکے سے قبل اس مقام سے گزر چکی تھی، جبکہ کوئٹہ سے پنجاب جانے والی عید اسپیشل ٹرین کو احتیاطی تدابیر کے تحت قریبی اسٹیشن پر روک دیا گیا ہے۔
واقعے کے بعد ریلوے حکام، بم ڈسپوزل اسکواڈ اور قانون نافذ کرنے والے ادارے جائے وقوعہ پر پہنچ رہے ہیں، جہاں ٹریک کا معائنہ اور شواہد اکٹھے کرنے کا عمل جاری ہے۔
