بلوچستان کے ضلع گوادر کے علاقے جیونی کے نواحی مقام پانوان میں فائرنگ کے ایک واقعے میں پاکستان کوسٹ گارڈ کے کم از کم دو اہلکار ہلاک ہو گئے۔
ذرائع کے مطابق واقعہ اس وقت پیش آیا جب کوسٹ گارڈ کے اہلکار علاقے میں موجود تھے۔ ابتدائی اطلاعات کے مطابق نامعلوم مسلح افراد نے گھات لگا کر اہلکاروں پر فائرنگ کر دی، جس کے نتیجے میں دو اہلکار موقع پر ہی جان کی بازی ہار گئے۔
واقعے کے بعد سیکیورٹی فورسز نے علاقے کو گھیرے میں لے کر حملہ آوروں کی تلاش شروع کر دی ہے، جبکہ مزید تفصیلات اکٹھی کی جا رہی ہیں۔
مقامی ذرائع کا دعویٰ ہے کہ اہلکار مبینہ طور پر علاقے میں بھتہ وصول کر رہے تھے جب ان پر حملہ کیا گیا۔
واضح رہے کہ گوادر اور اس کے نواحی علاقوں میں ماضی میں بھی سیکیورٹی فورسز پر حملوں کے واقعات پیش آتے رہے ہیں، جس کے باعث علاقے میں سیکیورٹی صورتحال اکثر کشیدہ رہتی ہے۔
