پنجگور: گزشتہ ہفتے نامعلوم مسلح افراد کے ہاتھوں اغواء ہونے والے نوجوان کی لاش آج برآمد کر لی گئی۔
تفصیلات کے مطابق پنجگور کے علاقے خدابادان سے تعلق رکھنے والے نوجوان عبدالحلیم کو گزشتہ ہفتے نمازِ تراویح کے بعد نامعلوم مسلح افراد نے اسلحے کے زور پر اغواء کر کے نامعلوم مقام پر منتقل کر دیا تھا۔
ذرائع کے مطابق آج عبدالحلیم کی لاش پنجگور کے علاقے سریکوران سے برآمد ہوئی ہے۔ مقامی ذرائع کا کہنا ہے کہ اغواء کاروں کا تعلق ایک سرکاری حمایت یافتہ مسلح گروہ سے بتایا جا رہا ہے، جسے مقامی سطح پر “ڈیتھ اسکواڈ” کے نام سے جانا جاتا ہے۔
پنجگور میں حالیہ دنوں میں اس نوعیت کے واقعات میں تشویشناک اضافہ دیکھنے میں آیا ہے۔ مقامی ذرائع کے مطابق گزشتہ ایک ماہ کے دوران مختلف علاقوں سے کم از کم بارہ سے زائد افراد کی لاشیں برآمد ہو چکی ہیں۔
ذرائع کے مطابق برآمد ہونے والی زیادہ تر لاشیں ان افراد کی تھیں جو اس سے قبل جبری گمشدگی کا شکار ہوئے تھے اور طویل عرصے سے لاپتہ تھے۔ ان مسلسل واقعات نے علاقے میں خوف و ہراس اور شدید تشویش کی فضا پیدا کر دی ہے۔
