لسبیلہ: سونمیانی وندر کے علاقے میں پیش آنے والے المناک ٹریفک حادثے میں لسبیلہ پریس کلب کے جنرل سیکرٹری، سینئر صحافی اور روزنامہ انتخاب کے بیورو چیف عزیز لاسی ہلاک ہو گئے، جب کہ ان کی بیٹی زخمی ہو گئی۔
حادثہ وندر پولیس اسٹیشن کی حدود میں، الجلیل ہوٹل کے قریب مین قومی شاہراہ پر تین گاڑیوں کے آپس میں ٹکرانے سے پیش آیا۔ تصادم کے نتیجے میں عزیز لاسی موقع پر ہی ہلاک ہو گئے، جبکہ ان کی بیٹی کو زخمی حالت میں قریبی اسپتال منتقل کیا گیا اور انہیں طبی امداد فراہم کی جا رہی ہے۔
واقعے کی اطلاع ملتے ہی پولیس اور ریسکیو ٹیمیں موقع پر پہنچیں اور شواہد اکٹھے کرنے کے بعد لاش کو ضابطے کی کارروائی کے لیے اسپتال منتقل کیا گیا۔ حادثے کے باعث قومی شاہراہ پر ٹریفک کچھ دیر کے لیے متاثر رہی۔
عزیز لاسی لسبیلہ کے سینئر اور متحرک صحافیوں میں شمار ہوتے تھے۔ ان کی ہلاکت پر صحافتی حلقوں، سماجی شخصیات اور شہریوں نے گہرے رنج و غم کا اظہار کیا اور اسے صحافت کے لیے ایک بڑا نقصان قرار دیا۔
