بلوچستان کے ضلع خضدار کی تحصیل نال میں فائرنگ کے ایک واقعے میں وڈھ سے تعلق رکھنے والے ایک ہندو تاجر سمیت تین افراد ہلاک ہو گئے، جبکہ ضلع کیچ کی تحصیل بلیدہ کے علاقے جنتری کور ندی سے ایک نامعلوم نوجوان کی لاش برآمد ہوئی ہے۔
تفصیلات کے مطابق تحصیل نال میں نامعلوم مسلح افراد نے فائرنگ کی، جس کے نتیجے میں تین افراد موقع پر ہی ہلاک ہو گئے۔ واقعے کے بعد علاقے میں خوف و ہراس پھیل گیا۔ اطلاع ملتے ہی قانون نافذ کرنے والے ادارے موقع پر پہنچ گئے، علاقے کو گھیرے میں لے کر شواہد اکٹھے کیے۔
ہلاک افراد کی لاشوں کو ضروری قانونی کارروائی کے لیے قریبی اسپتال منتقل کر دیا گیا ہے۔ پولیس کے مطابق واقعے کی نوعیت اور محرکات جاننے کے لیے تحقیقات کا آغاز کر دیا گیا ہے، تاہم ابتدائی طور پر واقعے کی وجہ معلوم نہیں ہو سکی۔ مزید تفصیلات کا انتظار ہے۔
دوسری جانب ضلع کیچ کی تحصیل بلیدہ کے علاقے جنتری کور ندی سے ایک نامعلوم نوجوان کی لاش برآمد ہوئی ہے۔ پولیس کے مطابق مقتول کو گولیاں مار کر قتل کیا گیا ہے، تاہم قتل کی وجوہات تاحال معلوم نہیں ہو سکیں۔ واقعے کی تحقیقات جاری ہیں۔
