بلوچستان کے درالحکومت کوئٹہ قمبرانی روڈ پر پولیس اور ایگل اسکواڈ کے مشترکہ ناکے کے قریب دو دہماکے ہوئے، حکام کے مطابق پہلا آئی ای ڈی دھماکہ سڑک کنارے نصب دھماکہ خیز مواد کے ذریعے کیا گیا، تاہم واقعے میں کسی قسم کا جانی یا مالی نقصان نہیں ہوا۔
پہلے دھماکے کی اطلاع ملتے ہی کرائم برانچ اور سی ٹی ڈی کی ٹیمیں جائے وقوعہ کی جانب روانہ ہوئیں، مگر جائے حادثہ کی طرف بڑھتی ہوئی کرائم سین کی گاڑی کو بھی قمبرانی روڈ پر دوسرے دھماکے کا نشانہ بنایا گیا۔ حکام کے مطابق دوسرا دھماکہ موٹر سائیکل میں نصب بارودی مواد کے ذریعے کیا گیا، تاہم اس میں بھی کوئی جانی نقصان نہیں ہوا۔
ابتدائی اطلاعات کے مطابق دھماکے پولیس اور تحقیقاتی ٹیموں کو نشانہ بنانے کی کوشش تھے، تاہم اعلیٰ سطحی حکام نے ہنگامی اجلاس طلب کرکے مزید اقدامات اور حساس مقامات پر سیکیورٹی بڑھانے کی ہدایت کر دی ہے۔
حملوں کی ذمہ داری تاحال کسی تنظیم نے قبول نہیں کی ہے۔
